最近我因為工作上出咗件事而離咗職。係咁嘅，我做游水教練嗰陣，唔小心留低咗個識游水嘅小朋友喺水入面。雖然佢爸爸當時喺現場，發現咗之後想搵我，但我冇即時理會。後來同事同家長溝通，個家長覺得好唔受尊重，亦覺得我唔理個學生嘅安全。因為呢件事，我需要上公司解釋，俾人鬧咗，最後就冇咗呢份工。
件事過咗一個月，我開始反思返過去兩、三年嘅工作經歷。我一直都覺得自己講嘢冇信心、唔夠大聲，甚至有啲「呃」住把聲。好似我第一份工喺銀行聽電話，俾客鬧嗰陣就好驚、好緊張、震晒。之後做咗兩年游水教練，但我自己其實麻麻哋鍾意游水，做嘅過程都唔開心。
我覺得揀呢兩份工都係一個錯誤，因為我對呢啲工作既冇興趣，亦覺得自己冇能力做得好，嘥咗好多時間。我好想透過工作獲得成就感同自信心，但呢啲經歷反而令我更加嚴重缺乏自信同自尊心，因為我覺得自己冇乜成功過，冇乜嘢值得驕傲。其實有好多其他工我可能更加適合，例如文職，可能喺呢啲地方我先可以搵到成就感。
最近我睇咗本書，入面講到應該要做一份自己「好想、好想、好想」去做嘅工，其他嘢唔重要，要即刻去做，將時間專注喺嗰份工度，唔好理其他雜亂嘅目標。我覺得呢個講法好有道理。
反省返教游水呢件事，冇錯，我係賺到錢，有咗工作經驗，亦令我成長咗、成熟咗，學識處理壓力，但呢份工最終令我對自己好失望，冇得到我想要嘅成就感同自信心。所以，我覺得揀呢兩份工係錯嘅，我應該要搵一份自己真正有熱情、有能力做得好嘅工作。