喺返工嘅過程入面，我其實遇到好多好好嘅人，佢哋都好主動想嚟認識我。但係我嘅反應就係永遠對人哋嘅主動唔瞅唔睬，態度好冷淡，就算佢哋不斷約我，我都係咁。我明白一段關係如果冇用心去維繫，好快就會斷，但我偏偏就係唔敢、亦唔想同人建立關係，就算對想同我做朋友嘅人都係咁冷淡。
因為咁，我錯失咗好多建立友誼嘅機會。如果過去幾年我改變態度，可能而家已經有好多朋友。但捫心自問，我係咪真係咁想要朋友呢？我又覺得唔係好想。其中一個原因係，我心入面有種（可能係唔應該有嘅）優越感，覺得自己讀嘅書、識嘅嘢（例如國際政治、歷史、科技等等）比佢哋多，有種知識上嘅優越感。同佢哋傾偈嗰陣，我會抱住一種「我同佢哋唔係同一個世界嘅人」嘅諗法。
呢個諗法又唔係完全冇根據，因為我講嘅嘢、我有興趣嘅嘢，例如政治、時事、IT、Programming、AI、科技、古羅馬史、晚清史、香港史等等，佢哋好明顯係冇乜興趣嘅。我感覺好難搵到同我有共同興趣嘅人。
當然，我都明白一開始唔可能就傾啲咁認真嘅話題。但問題係，我需唔需要咁多人同我傾偈呢？我又覺得唔需要。需唔需要咁多朋友呢？我其實唔鍾意。再加上我有社交焦慮，尤其係一大班人嘅場合，例如去 Party Room 或者食團年飯，我會感到好大壓力，甚至去完之後會喊、會好唔開心。冇乜人知道我有咁嚴重嘅社交焦慮，但喺一大班人裡面真係好辛苦。
返工識到嘅朋友，我係想認識嘅，但一方面覺得同佢哋格格不入，另一方面我比較鍾意單對單傾偈，唔鍾意一班人咁樣玩。我唔鍾意嗰啲玩樂為主嘅朋友圈子，反而鍾意文靜啲、可以傾認真嘢嘅朋友。而且，我又唔識打牌、飲酒、玩好多遊戲，又唔識搞氣氛，講嘢又唔叻，成日講埋啲尷尬嘢。
所以，對於之前啲同事/朋友唔再理我，我係有啲難過，覺得好似俾人放棄咗。但我又唔怪得佢哋，因為始終係我自己決定對人冷淡先。呢個結果，只可以怪我自己。
我之所以對人冷淡，係因為我對人際關係好冇安全感。我好驚俾人話尷尬、驚融入唔到、驚人哋唔鍾意我。因為驚呢樣驚嗰樣，搞到我同人相處嗰陣好放唔開，成日都好拘謹，做唔到真正嘅自己。而呢啲嘢，人哋係會感覺到㗎嘛。當人哋感覺到你唔信任佢、唔係真心嘅時候，佢哋自然都唔會對你真心、對你放得開。
所以，當我咁樣保護自己，將自己層層包喺盔甲入面嘅時候，自然就會導致呢啲結果。但你問我鍾唔鍾意呢種感受？老實講，我其實係鍾意自己一個人嘅。可能幾個月先搵一次朋友，對我嚟講已經足夠開心。我比較自我中心，我真正在意嘅，可能只係人哋點樣睇我，而唔係真係想建立一段關係。當關係真係開始靠近嘅時候，我就會「縮沙」、會想逃避。